रास्वपाका कार्यकर्ताद्वारा मतगणना स्थल सरसफाइ

मर्चवार । रुपन्देही निर्वाचन क्षेत्र नं. ४ को मतगणना स्थलमा राष्ट्रिय स्वतन्त्र पार्टी (रास्वपा) का कार्यकर्ताहरूले सरसफाइ अभियान सञ्चालन गरेका छन् ।

फागुन २१ गते सम्पन्न प्रतिनिधिसभा सदस्य पदको निर्वाचनपश्चात् मतगणना भइरहेको कार्यालय बाहिर विभिन्न दलका समर्थक तथा कार्यकर्ताहरूको भीडका कारण फालिएका प्लास्टिक, कागज लगायतका फोहोर आइतबार बिहान सफा गरिएको रास्वपाका कार्यकर्ता  ई. माधव कान्दुले जानकारी दिनुभयो ।

उहाँले समाजप्रति युवाको जिम्मेवारीबोधलाई आत्मसात् गर्दै सरसफाइ गरिएको बताउनुभयो । “हामीले गरेको फोहोर सफा गर्नु पनि हाम्रो जिम्मेवारी हो भन्ने सोचका साथ हामीले सरसफाइ गरेका हौँ,” उहाँले भन्नुभयो। आजको सानो लापरबाही भविष्यमा ठूलो वातावरणीय समस्या बन्न सक्ने भएकाले फोहोर व्यवस्थापनमा सबै सचेत र जिम्मेवार हुनुपर्ने उहाँको भनाइ छ । युवाहरूले सकारात्मक सोच र सामाजिक उत्तरदायित्वका साथ सरसफाइ अभियानलाई निरन्तरता दिनुपर्ने उहाँले जोड दिनुभयो ।

‘नयाँ सोच, युवा नेतृत्व’ को भावना अनुसार समाजमा सकारात्मक परिवर्तन ल्याउने उद्देश्यले यस्तो अभियान सुरु गरिएको उल्लेख गर्दै उहाँले रुपन्देही क्षेत्र नं. ४ का नागरिकले दिएको विश्वासअनुसार यस क्षेत्रका हरेक समस्या समाधानमा पार्टी सधैं जिम्मेवार रहने बताउनुभयो ।